A neu's Dirndl

Es is scho her guad zwanzig Jahr,
do hot sich eine Deandlschar,
aufg'macht nach Bad Tölz zum Schneider,
woll'n se macha lass'n neue Dirndlkleider.
Scheinbar hot's damois wirklich g'foin,
denn alle ham's des Dirndl woll'n.
So ganz genau woaß ma des jetzt nimmer,
und hätt des wirklich sei soll'n für immer?
Doch im Lauf der letzt'n Jahr,
de Mode hot se verändert es is wahr,
do san de Deandl aufmüpfig wor'n,
und ein Gedanke is gebor'n.

"Mir wolln's nimmer hom, mir ziang's nimmer o,
wie schaut denn des aus, ge schaug da des o.
Ma schwitzt so vui, es beißt und zwickt,
z'eng is und dann macht's a no dick.
Orasch-grün kringl't is da Rock,
a so a Anblick is ja a Schock.
Oane gibt's de wollt's glei verbrenna,
a so a g'spinnade Henna.

Immer lauter werd des G'schroa,
überall z'hörn in der ganz'n Gmoa.
Viele Deandl ham rebelliert,
lautstark g'schimpft ganz ungeniert.
Kurzum a neues G'wand muaß her,
was Schen's, Bequem's, einfach leger.
Ned oidbachan, ned z'vui Firlefanz dro,
möglichst schlicht hoit, aber edel fei scho.

Glei hat ma's z'am besprocha  und ausdischkriat,
und in zwoa Sitzungen des neue Gwand kreiert.
Es is kaum zu glaub'n, alle Deandl ham entschied'n,
für oa oanzig's Kleidl und des ois in Fried'n.

Und de Moral von der G'schicht,
alle Deandl macha wieder a lustig's G'sicht
                                                                                              Silvia

www.kranzbergler.de

www.trachtenverein-kranzbergler.de